WALA na makamata ang magtiayon nga natulog sa ilahang panimalay sa Barangay Basak, Mandaue City kagahapon sa ala una sa kadlawn, Mayo 04, 2022 human nga matumbahi ang ilahang pinuy-anan sa usa ka palm tree.
Si Fire Officer 1 Riel Denura sa Mandaue City Fire Office miila sa mga biktima nga sila si Rizalda Giducot, 45-anyos, ug Benjie Giducot, 43-anyos.
Si FO1 Denura nagkanayon nga nangatulog ang magtiayon dihang natumba ang punoan sa kahoy nga nahimutang kilid sa ilang balay.
Matod ni Denura nga partially nga naibot na ang punoan tungod sa kusog nga hangin nga dala sa super typhoon Odette niadtong Disyembre 2021.
Dugang niini nga gawas sa balay sa magtiayon nga hingpit nga naguba, laing balay usab ang nakaangkon og kadaot tungod sa pagkatumba sa kahoy apan walay naangol sa maong balay.
