EPEKTIBO na ang laing pagkunhod sa presyo sa gasolina ug krudo sa managlahing gasolinahan sa General Santos City buntag sa adlaw nga Martes Hulyo 12, 2022.
Sa unang gasolinahan nga na-agihan sa Brigada patrollers sayo sa buntag sa FilAm Road, Barangay Fatima sumala sa usa ka pumpboy sa ASF Gas Station nga nagpailang si Roger, anaa sa P6.10 ang ilang gikunhod sa krudo samtang P5.70 sa gasolina matag litro.
Tungod sa kunhod ang ilang baligya sa diesel P80.50 matag litro sa gasolina P75.50 hangtud sa P75.80 matag litro.
Samtang sa laing gasolinahan sa Barangay Calumpang susamang kantidad ang gikunhod sa kompanyang Shell, sumala sa pumpboy nga nagpailang Jerry nagsugod sila alas 4 sa kaadlawon.
Ang ilang presyu karon sa krudo gikan sa P80.63 matag litro hangtud P85.83 samtang sa gasolina gikan sa P76.34 matag litro hangtud sa P77.58 matag litro.
Samtang ang Phoenix sa National Highway nagpakunhod sila alas 6 sa buntag apan wala kaabot og P6, ang ilang presyo karon sa krudo P84.50 matag litro sa ilang gasolina anaa sa P79.40 matag litro.
Gumikan sa dako nga kunhod sa presyo sa krudo ug gasolina nangumpra og daghang gasolina ang usa ka negosyante sa Barangay Tambler.
Sumala kay Abdulbayan Simpal, 53-anyos nga nalipay siya nga niubos ang presyo sa lana kay makabaligya siya og daghan sa iyang pwesto sa Barangay Tambler mao nga gikan sa pito nahimong 10 ka container ang iyang gikumpra sayo sa buntag. I Ver Diazon
