Magapangatubang sang kaso nga trespass to dweling ang babayi nga kaupod ni alyas Tanya sa pagsulod sa balay sang negosyante sa Brgy. Baybay, Roxas City takna alas 4:00 kahapon sang Martes, Hulyo 23.
Sandig sa Roxas City Police Station, nagpanawag sa ila istasyon ang biktima nga si alyas Dante, 73-anyos agud i-report nga may duha ka tawo ang nagsulod sa iya balay kun sa diin ginkilala ang mga suspek kay Jonathan Cartujano alyas Tanya, miyembro sang LGBTQ+, yara sa legal nga pang-edaron kag residente sang Brgy. VII, Roxas City kag Rosalie Farinas, 37-anyos, may-asawa kag residente naman sang Brgy. San Roque, Dumalag, Capiz.
Suno sa panaysayon sang biktima, sang ini ang nagbugtaw, ginbuksan niya ang pertahan sang isa ka kwarto sang iya balay, ginkakibot nalang sini sang iya makita ang isa ka agi nga nagahigda sa katre. Gintinguhaan niya nga dakpon ang suspek nga si Tanya apang madasig ini nga nakapalagyo sa indi matumod nga direksyon.
Pagkatapos, gilayon nga nagsaka ang biktima sa second floor sang iya balay kun sa diin ginbuksan naman niya ang isa ka kwarto kag didto naman niya nakita ang suspek nga si Rosalie nga nagakatulog sa higdaan. Ginpahayag ni Rosalie nga gindala siya ni alyas Tanya sa amo nga balay kag ginpatulog sa kwarto agud makighilawas sa biktima. Sang ulihi, natukiban nalang sang biktima nga wala na ang iya P5,000 nga cash nga nakasulod sa iya wallet kag si Tanya ang nagtaban.
Natigayon naman nga maaresto sang kapulisan si Rosalie kag gindala sa Roxas City PNP para sa nagakaigo nga disposisyon. | Judy ann Juare
