NAGPAKITABANG sa kapulisan ang usa ka babayeng pasahero human kini gibastos sa usa ka traysikel drayber pinaagi sa pagbungat og dili maayong mga pulong.
Sumala sa impormasyon sa Traffic Enforcement Unit kon TEU-Gensan nahitabo ang insidente Disyembre 27 sa udto samtang panaog na ang biktima atubangan sa usa ka mall sa J. Catolico Avenue, Barangay Lagao, Gensan.
Matud sa biktima naghangyo kini sa drayber nga monaog siya duol sa usa ka pedestrian lane apan nasuko matud pa ang drayber ug giingnan siya nga dili kabalo mobasa, rason nga nasuko ang biktima ug gipamasahian niya og 10 pesos ang drayber. Pag-abot sa entrance sa mall, gisinggitan sa drayber ang biktima tungod kulang ang pamasahi ug gihapak niini sa kamot ang babaye.
Nangayo og tabang ang biktima sa guwardiya apan nasuko na pag-ayo ang traysikel drayber ug gilayon misibat palayo sa lugar. Gibana-bana sa biktima nga anaa sa 30-anyos ang pangidaron sa wala mailhing drayber, tambokon ang lawas ug 5’3 ang gitas-on niini.
Sa kasamtangan padayon nga gisubay sa kapulisan ang plate number sa traysikel aron mailhan ang maong drayber nga nanakit sa iyahang pasahero. I Enamie Mogpon
