Gikatakda nga mupa-uli na unta sa Mabini, Davao de Oro si Reah Mae Tocmo, 20 anyos, karong Hulyo 21 tuig kasamtangan human nga mihangyo kini sa iyang igsoon nga lukatan og ticket.
Kini ang gibutyag sa bana sa igsoon ni Rhea Mae nga si Jay Poblacion, sumala pa niini nga duha ka bulan na nga na-missing ang biktima ug bag-ohay lamang sab sila nasayod nga naa diay kini sa Cebu City.
Saysay pa ni Jay nga sila ang nagpa-eskwela ni Rhea, ug dunay us aka higayon nga nananghid kini nga mutambong og debut apan wala na kini miuli.
Dugang nasayran nga wala na kini miuli sa kahadlok nga makasuk-an gumikan wala kini kahuman sa iyang pagtungha human nga sumala pa nabuntis.
Mikuyog sumala pa si Rhea sa iyang mga barkada padulong sa Cebu aron nga manarbaho sa usa ka restaurant.
Sumala pa ni Jay nga kugihan nga bata ang biktima, ug maayo sab kini sa iyang pagtungha gani pirmi kini nga maka-honor hinungdan nga interesado ang iyang asawa nga igsoon ni Rhea nga pa-eskwelahon kini.
Kahinumdoman nga nakaplagan na lamang ang dalaga nga wala nay kinabuhi nga gisulod og karton sa South Verdana Subd., Katipunan St., Barangay Tisa, Cebu, ala-1:00 sa hapon, Hulyo 17, 2023, ug positibo kining giila sa iyang kabanay.
