GIBUTYAG sa pamilyang Canillo nga taga Barangay Olympog, GenSan nga dili tinood nga gipasagdan nila ang anak nga babaye nga si Alyas Jen human gi-rescue kini ug gidala sa Tinagacan Police station.
Sa impormasyon ni Irish Palate nibisita siya sa iyang pamilya sa Purok Sampao, kaniadtong Biyernes sa hapon Hulyo 16.
Samtang nanglimpyo sila sa uma nakita niini nga adunay babaye sa kabagnotan nga nagapangayo og tabang ilang giduolan ug gikuha ang babaye nga naila kang Alyas Jen.
Nagpatabang sila sa kapulisan aron madala kini sa presento ug maatiman.
Matud ni Palate nakita niya nga daw susama sa balay sa iro ang pinuy-anan ni Jen ug nakita nila nga daghang gamit sa sulod adunay unlan, adunay mga empty bottle, ug adunay bibiron sa bata.
Gituohan sa nasangpit nga ginahatdan og pagkaon si Jen tungod aduna silay nakita nga mga balunan.
Nakagapos matud pa ang tiil sa babaye samtang nagduyan ug nangayo kini og tabang tungod daghan matud pa ang nagasakit ug nagalugos kaniya sa maong lugar.
‘Somebody help me this is Jen” nakasulat sa kahoy kung asa nakit-an si Jen.
Dihang nakita ni Palate ang kahimtang ni Jen pagka Sabado sa buntag iyaha kining gibalikan sa presento sa kapulisan aron hatdan og gamit. Apan pakyas siya tungod gikuha na matud pa kini sa iyang pamilya.
Giadtuan sa Brigada ang lugar sa pamilya sa Purok 2, Brgy. Olympog ug gihinabi ang inahan ug igsoon niini.
Matud sa igsuon nga si Genalyn Curaza nakaabot sa ilaha ang impormasyon nga ang iyang igsuon nga si Jen gidala sa kapulisan hinungdan nga ilaha kining gikuha ug gidala pauli sa balay.
Gihimakak niini nga dili tinuod ang migawas nga mga impormasyon nga adunay naglugos sa ilang igsuon ug wala matud pa nila kini gipasagdan.
Samtang sa bahin sa inahan nga si Teresita Canillo dugay na nga nagkasakit si Jen gikan tuig 2016 human kini gibiyaan sa iyang ka-live in partner.
Daghang higayon na nila kining gipatambalan sa doktor ug dihang maayo molakaw kini aron pangitaon ang iyang uyab kaniadto.
Sumala niini adunay silay balay sa Purok Sampao ug didto nila gibilin si Jen samtang nanimba sila niadtong higayona dihang na-rescue siya sa mga pulis.
Matud ni Canillo gikan pagbiya sa ka live-in partner sa iyang anak duha ka tuig ang milabay nalumpo na si Jen ug dili makalakaw hangtod nga nagkasakit na kini sa iyang panghuna-huna.
Nangayo og tabang pamilya nga patambalan si Jen tungod nahurot na ilang kabtangan ug wala na nila kini nadala sa ospital. I Enamie Mogpon
