Nagpa blotter ro sangka babaye sa Lezo MPS matapos segun nga ma-hack ro anang facebook ag messenger.
Sa interview it BRIGADA NEWS FM KALIBO kay Tess Nolasco Tabing, ku Nobyembre 2 hay may paga kontakon kunta imaw pero indi eon nana makontak ro mga raya bangud na-block eon ro anang account.
Indi eonman segun nana mabuksan ro anang facebook account, ag maabu eon segun sa anang mga kakilaea ro naghambae nga may 97 katawo eon ro na-tag it anang account.
May mga nag chat man segun kana angot sa anang pagpa Gcash niya, nga owa man ngani segun imaw it Gcash ag naga papromo pa segun imaw gamit ro account ni Tess Tabing.
Ro natandaan segun ni Tabing bago ma-hack ro anang account hay may nagpadaea kana it link angot sa mga benepisyong mabuoe it sangka senior citizen.
Bangud may ginaalagaan segun imaw nga senior, naisip nana nga ipasueod ro anang alaga agud maka avail man it benepisyo, pero kat nag-chat eon imaw sa nagpadaea it link, owa eon raya naga reply.
Ginpakamayad man nga iparekord sa pulis ni Tabing ro insidente sa kahadlok nga basi may magreklamo it pagpangloko kontra kana. // ANN DESLENE SALAZAR
