LEGAZPI CITY – Planong pakusugon kan Albay Public Safety and Emergency Management Office (APSEMO) an information asin education campaign na may kinaraman sa linog ngunyan na taon 2024.
An nasambit na plano, para sa mga Albayano kun sain tatawan an mga ini nin dugang pang impormasyon kun ano an mga dapat na gibuhon o mga preparasyon enkaso tamaan nin linog an probinsya.
Segun kay APSEMO Chief Dr. Cedric Daep, plano kan saindang opisina na magsagibo nin lecture sa mga bagong opisyales kan mga barangay sa probinsya ngunyan na bulan.
Mawot kan isasagibong lecture na makanuod an mga opisyales kan barangay nin tamang pagresponde pag nagkaigwa nin linog sa saindang lugar.
Para kay Daep, importante subuot na igwa nin kahandaan asin kaaraman an gabos orog na an mga opisyales kan barangay pag-abot sa linog nganing maibitaran an anuman na mga dai piglalaomang mga pangyayari.
