-Daina Gerona
KABANKALAN CITY, Negros Occidental — Naga-antus ang pila ka mga mamumugon sa syudad sang Kabankalan sa mataas nga presyo sang pila ka mga nagapanguna nga balaklon sa merkado, apisar sa pagpatuman sang price freezing ukon ang pagpuggong sa pagpata-as sa presyo sang mga prime and basic commodities bangud sa pagdeklara sang State of Calamity.
Base sa interview nga ginpatigayon sang Brigada Kabankalan sa pila ka mga vendors kag mamumugon wala sila sang may nabatyagan nga pagpatuman sang price freezing, bangud nga sa mga magagmay nga mga tyange dako man sa gihapon ang patong sa mga balaklon.
Suno sa kay alyas Mema, nga yara sa tag P26 tubtob P29 ang presyo sang sardinas nga ginabakal nila sa tyange, P18 naman ang presyo sang noodles. Palayag pa ni Mema nga nagdugang pa ang balayran sa kuryente nga gulpyada man nga nagsaka nga wala sang abiso.
Nahibaluan nga may ginpanagtag man nga ayuda ang gobyerno pa-agi sa Department of Social Welfare and Development (DSWD) kaangay sang grocery packs, bugas kag cash aid, subong man may yara naman sang pala-abuton nga cash aid para sa mga mangunguma nga apektado sang El Niño.*
