-Reymund Titong
NEGROS OCCIDENTAL, Philippines — Nagahingyo ang ginatos nga mga pamilya nga naga-estar sa lima ka Purok sang Tabugon nga sakop sang duta nga ginapanag-iyahan sang Philippine National Bank (PNB), nga kun mahimo iga-relocate nalang sila sang syudad sa sulod lang sang ila Barangay.
Sa interview sang Brigada News FM-Kabankalan kay Kagawad Reyjan Mahusay, iya ginpahayag nga nagpatigayon sang pagsinapol ang mga purok president sang lima ka purok nga apektado sang land right claim sang PNB, kag ila ginkasogtan nga kun may relocation site ang syudad, kun tani sa sulod nalang sang ila barangay.
Ila man ginaduso ang posiblidad nga kun makaya lang man sa syudad baklon ang duta sang PNB, agud indi na sila kinahanglan e-relocate kag indi na sila mabudlayan sa ila mga pangabuhian.
Ang hingyo sang mga pumuluyo ang ila sabat matapos sang pahayag si Kabankalan City administrator Mac Lord Zafra nga yara ang syudad sa proseso sang pagpamakal sang duta, agud magamit bilang relocation sites sa serkumstansya parihas sa natabo sa Tabugon.
Una na nga nagpasalig ang alkalde sang syudad sang bulig sa mga apektado nga pumuluyo, apang sa karun, wala pa sang klaro nga mga tikang kun diin sila e-relocate, ano kalapad sang ila saylohan, kag san-o sila pwede ka saylo, kun ang relokasyon nga option ang paga-estoryahan.*
