Andy Galve, Reymund Titong
KABANKALAN CITY, Negros Occidental — Indi na bag-o ang natabo sa Puli, Sitio Budyong, Barangay Orong, sa syudad sang Kabankalan, hapon sang Dominggo, Nobyembre 3, nga pagguwa sang mga lago ukon earthworms gikan sa duta.
Sa eksklusibo nga interview sang Brigada News FM-Kabankalan kay Ma May Opino, Crop Protectionist, Agriculturist, kag manunudlo sang Central Philippines State University (CPSU), iya ginpahayag nga ang paguwa sang mga lago normal nga gakatabo matapos ang mabaskog nga ulan.
Iban pa gid nga rason sa ila pag ginuwa amo ang pag-pangita nila sang pagkaon, pag padamo, kag kun naga pangita sang bag-o nga puluy-an (habitat), suno kay Opino.
Sa iya man pag-konsulta kay Dr. Marivic Pedrosa, Soil Scientist sang CPSU, iya ginpahayag nga isa pa gid sa mga rason sa pag-ginuwa sang mga lago amo ang posibilidad nga saturated ang ila lugar. Sa mas simpli nga tinaga, nalab-ot sang tubig sa ila ilistaran, nga nagin rason sa pagnubo sang oxygen sang duta.
Sa pagpanalawsaw nga may tigulo, Impacts of earthworms on soil components and dynamics ang lago ang nagabulig hatag nutrisyon sa duta nga naga-resulta naman sa manami nga produksyon sang mga pananum.
Nagguwa ang balita, matapos nag post si Rene Boyayot sang isa ka video nga nagapakita sang pag ginuwa sang madamo nga lago sa ila lugar.
Mismo si Boyayot man ang nagkunpirmar nga taga tuig na nga naga ginuha ang mga lago sa ila lugar, ilabi na sa tyempo sang tig-ululan.
Wala naman scientific basis ang mga sugilanon nga ang pag dagsa sang lago sa isa ka lugar ang nagapatima-an nga may delubyo nga maga luntad. -BNFM Kabankalan
