Nagaabot eon sa P500k ro inisyal nga estimated damages sa natupok nga ancestral house ag kaeapit nga bahay kara nga nadaeahig matapos matabo ro sunog.
Natabo ro sunog sa Sta. Rita Street, Brgy. Poblacion, Ibajay, Aklan ag natupok ro ancestral house kung siin nag umpisa ro kaeayo samtang partially damage man ro kaiping nga baeay kara nga nadaeahig sa insidente.
Ro nasambit nga ancestral house hay ginapanag-iyahan ni Antonio Magpusao.
Sa interview it Brigada News FM Kalibo kay FO2 Cristian John S Calzado it Bureau of Fire (BFP-Ibajay), base sa mga nakasaksi sa insidente, bandang alas 5:30 it hapon kahapon natabo ro sunog.
Insigida segun nanda nga ginpataas sa 2nd alarm ro andang status ngani nakaresponde man ro Nabas Fire Station, Tangalan Fire Station, Makato Fire Station, Ibajay PNP, Ibajay MDRRMO, Nabas MDRRMO, Poblacion Kalibo BDRRMO ag AKELCO.
Samtang, sangka 66 anyos nga lola ro insigida nga na-rescue matapos ma-trap sa nagakasunog nga baeay.
Nag-angkon raya it first degree burn sa alima, waea nga tuhod ag iba pang parte it kaeawasan rasun nga insigida raying gindaea sa Ibajay District Hospital.
Sa makarun suno kay FO2 Calzado hay padayun pa nanda nga ginaimbestigahan ro rasun it sunog. / ANN DESLENE SALAZAR
