Boluntaryo nga nagsungka sa Tapaz Municipal Police Station ang isa ka anay miyembro sang Communist Terrorist Group (CTG) sadtong tinalikdan nga adlaw sang Sabado, Hulyo 22.
Sandig sa impormasyon nagikan sa Tapaz PNP, ang wala na ginhingadlan nga anay rebelde ang isa ka squad member sang Igabon Platoon, Central front, KR Panay.
Apang, nagdesisyon nga magbiya sa terorista nga grupo sadtong tuig 2018 matapos ang kabudlay nga naeksperensyahan sa ibabaw sang bukid kag pagkamuklat sini sa kamatuoran nga wala sang maayo nga madangatan ang pag-upod niya sa nasambit nga grupo.
Kadungan sang iya pagsungka, ginturn-over man sini ang isa ka unit sang long barrel homemade 12-guage shotgun nga wala sang bala.
Nagpalab-ot naman sang bulig ang LGU-Tapaz sa pagpanguna ni Mayor Roberto Palomar sa nagsungka nga CTG member agud makabulig sa iya nga pang-adlaw-adlaw nga pagkinahanglan. | Judy Ann Juare
