Pilas sa ulo ang naangkon sang isa ka soltero matapos ginlabo sang iya kaugalingon nga amay sa Sitio Saugan, Barangay Sta. Teresa, Dumalag, Capiz takna alas 11:20 kagab-i sang Huwebes, Hunyo 27.
Ginkilala ang biktima kay Giarind Frontada, 26-anyos samtang ang suspek amo si Hermilito Frontada, 51-anyos, lunsay mga mangunguma kag residente man sang nasambit nga lugar.
Sandig sa imbestigasyon sang Dumalag Municipal Police Station, nag-inom sang makahulubog nga ilimnon ang biktima kaupod ang iya utod sa balay ni Barangay Kagawad Evelyn Bueno. Sang nagpauli na ang mga ini sa ila balay, nag-angkon sang pag-binaisay ang biktima kag amay sini nga nagresulta sa pagpanglabo.
Madasig nga ginpadangat sa Tapaz District Hospital ang biktima para sa nagakaigo nga pagbulong.
Nagaguwa sa imbestigasyon sang mga pulis nga kahulugbon ang motibo sa nasambit nga insidente. | Judy Ann Juare
