Dead on the spot ang 34-anyos nga amay matapos nakabunggo ang ginamaneho sini nga motorsiklo sa isa ka tricycle samtang pilason naman ang 9-ka tuig sini nga bata nga backrider sa barangay Poblacion, Tapaz, Capiz.
Sa impormasyon nga nakuha sang Brigada News FM nagikan sa Tapaz Municipal Police Station, ginkilala ang mag-amay nga sanday Rex Landar Jimenez kag alyas Nonoy lunsay residente sang Barangay San Vicente sa nasambit nga banwa.
Ginapahayag, nga nag-overtake si Jimenez sa ginasundan nga Ceres Bus nga ginamaneho ni Victor Emmanuel Ignarlen apang wala sini madiparahan ang kasugata nga tricycle nga ginamaneho sang wala matumod nga driver rason nga nakabunggo ini.
Bangud sa impact sang pagkabunggo, nag-angkon sang pilas sa nagkatuhay nga parte sang iya lawas si Jimenez kag naglampus ang ulo sini sa sementado nga dalan nga gintunaan sang iya kamatayon.
Pilason naman ang menor de edad nga bata sang biktima kun sa diin gilayon nga ginpadangat sa Roxas Memorial Provincial Ospital sang mga nagresponde nga rescue team para dapatan sang pagbulong.
Sa karon, nagapabilin sa kostudiya sang kapulisan ang mga imbolbado nga salakyan kag driver sang ceres bus samtang ang driver naman sang tricycle ang wala pa makilala nga madasig nagpalagyo matapos ang aksidente. | KMD Gicalde
