LEGAZPI CITY – Presente nang African Swine Fever-free an bilog na probinsya kan Albay – ini an kinumpirmar kan Albay Veterinary Office makalihis na ideklarar na nasa pink zone status na an banwaan kan Tiwi sa ASF.
Sa intrevista kan Brigada News FM Legazpi kay Provincial Veterinarian Pancho Mella, sinabi kaini na boot sabihon kaini, wara na ki eksistido o aktibong ASF virus sa nasambit na banwaan. Kun marurumduman kaya kan nakalihis na bulan nin Abril, apat na barangay an nagkaigwang kaso nin ASF alagad makalihis an 90 diaz, naideklarar nang negatibo ini sa virus.
Pigklaro niya, dawa pa ASF-free na liwat an probinsya, dai man giraray pighahale an paghihigot siring kan border control bilang paagi nganing ma-monitor an mga hayop na nagraralaog-luwas sa probinsya. Siring man, dawa pa magkaigwa man ki bakuna kontra ASF, matenir man giraray an border control asin wara sa plano nindang halion ini.
Mientrastanto, pigsiyerto ni Mella na su mga tagsadiri kan mga orig na pig-depopulate sa apat na barangay kan Tiwi huli sa ASF, natawanan na ki financial asin livelihood assistance na hale sa gobyerno.
