Nagpanindugan si Aklan police director Col. Crisaleo Tolentino nga uwa itkamatuu-ean ro mga alegasyon kuntra kay Malay police chief Lt. Col. Don Dicksie De Dios.
Ginbasura ni Tolentino ro ‘wild allegations’ nga nagapangayo segun it “pabor” si De Dios sa mga negosyante sa Boracay Island para sa anang kaugalingon nga benepisyo.
Ginbalibaean man nana nga ro Malay municipal police station hay nagabaton it 60% share it P2,500 nga multa para sa mga nag-eapas sa curfew sa isla.
Base pa sa impormasyon, nag-stay segun si De Dios sa sambilog ka kilaea nga beachfront hotel it pilang buean nga libre.
Kasunod dikara, ginhamon ni Tolentino ro “concerned citizen” nga nagreklamo angot sa isyu nga maglantad agud masayuran kung may kakulangan gid man ro mga kapulisan sa andang mga ginahiwat nga operasyon./JIL B. LACSON
