Uman nga naka-produce it daywang bag-ong mga Chief Girl Scout Medalists ro Aklan Council para sa dag-on 2021.
Ro Chief Girl Scout Medal Award hay sambilog sa prestihiyoso ag pinakamataas nga award nga pwedeng maitao sa sangka Girl Scout kung imaw hay makaubra ag makakompleto it sangka community development project sa sueod it sang dag-on.
Ap-at nga areas of work ro pwedeng pilion nga project it sangka Girl Scout base sa kinahangean it anang komunidad ag raya hay ro Ecology, Health, Livelihood ag Cultural Heritage.
Sa dag-on 2021, daywang mga Girl Scouts ro maisug ag determinado nga nagpatigayun it Chief Girl Scout Projects sa area it Health – Help Children Grow: Feeding Program.
Raya hay sanday Cadet GS Fiona Zoe Nejar ag Cadet GS Maebel Tagua, nga parehung Grade 12 students.
Sanday Nejar ag Tagua hay nagsustenir, nagtao it dedikasyon, oras, ag serbisyo para sa pagbulig sa mga pamatan-on it Brgy. Camanci Sur Community Day Care Center ag mga unga sa Ati Community sa Brgy. Laguinbanwa, sa banwa it Numancia.
Tinutuyo nanday Nejar ag Tagua nga sa panahon it pandemya hay makabulig sanda sa mga inunga pinaagi it Feeding Program para bisan paano hay mabuhinan ro gutom sa kumunidad sa bulig ku andang mga feeding donors ag sponsors, troop leaders ag iba pang mga nagbulig.
Ginpatigayun ro pagkilaea sa daywang mga Chief Girl Scouts via Zoom ku June 3, 2022.
Magabatun sanda it certificate, Chief Girl Scout Medal ag pin. / ANN DESLENE SALAZAR
