Reymund Titong
KABANKALAN CITY, Negros Occidental — Matapos ang pito ka tuig humalin nangin layi ang “Free Internet Access in Public Places Act” sang May 23, 2017, tigayon na nga naka-avail ang syudad sang Kabankalan sang “Free Wifi For All” program sang Department of Information and Communications Technology (DICT).
Sa dokumento nga ekslusibo nga nakuha sang Brigada News FM-Kabankalan, ang mga lugar sa syudad nga nalakip nga pagabutngan sang wifi hotspots amo ang Kabankalan City Hospital, Lorenzo D. Zayco District Hospital, Tagukon Barangay Hall, Kabankalan City Hall, Kabankalan City Library, Kabankalan City Public Plaza, kag Provincial Training Center sa syudad.
Nahibaluan nga maga-umpisa na hatag sang libre nga internet access ang DICT sa Kabankalan City Public Plaza sa maabot nga Byernes, Oktubre 4.
Antis nagtakop sang 2023, may yara na sang 25,000 free wifi project sites sa Pilipinas kag plano dugangan agud malab-ot ang target sang ahensya nga mahatagan internet connection ang 40 ka milyon nga Filipino sa 2028.
Sa pinakaulihi nga report para sa 2024, may maga dugang nga masobra 13,000 ka wifi access point sites sa pungsod nga may budget nga P3.68 bilyones, agud mapadayon ang paghatag sang libre nga wifi sa mga pampubliko nga mga lugar. – BNFM Kabankalan
