NAGSUGOD na ang final testing and sealing sa mga vote counting machines kun VCM sa 55 ka mga polling precincts sa GenSan, Mayo 4 sa buntag.
Segun ni Atty. Jose Villanueva, tigpamaba sa Comelec region-12 nga hangtud sa Mayo 7 sa kasamtangang tuig ang ipahigayong final testing and sealing aron masigurado nga nagagana ang mga VCM.
Ang mga magtutudlo ang gitugutan nga mag-test sa ilang mga VCM sa sulod sa ilang precinct nga serbisyohan sa May 9.
Dugang ni Villanueva nga ang resulta sa final testing and sealing apil sa report sa mga magtutudlo ngadto sa Comelec paghuman sa botasyon.
Nanghinaut si Villanueva nga walay kakulian sa mga VCM nga gamiton sa eleksyon kay ang repair hub niini anaa pa sa Davao City.
Nakita daw usab nila nga excited na ang mga magtutudlo sa eleksyon samtang nangayo usab kini og despensa sa mga magtutudlo kung wala pa ang allowance sa training nga tag usa ka libo ka pesos matag adlaw.
Sumala pa kay Villanueva nga maghulat lang ang mga magtutudlo lakip ang mga venue sa ilang training kay tibuok Pilipinas gina-asikaso sa finance department sa Comelec. I Ver Diazon
