KORONADAL CITY- “Mining is not evil. Hindi ito demonyo. Ang demonyo ay ‘yung pinipigilan natin ang mga tao kung paano umunlad”.
Ito ang inihayag ni Department of Environment and Natural Resources o DENR OIC Secretary Jim Sampulna sa isinagawang public hearing kaugnay sa isinusulong na pag-amend sa Environment Code ng South Cotabato at pag-lift sa open-pit mining ban.
Ayon kay Sampulna na malaki ang maitutulong ng open-pit mining sa ekonomiya ng South Cotabato at Pilipinas na labis na naapektuhan ng COVID 19 pandemic lalo na’t ang $ 5.9 billion Tampakan Project ng Sagittarius Mines Incorporated o SMI ang may pinakamalaking deposito ng copper at gold sa buong bansa.
Panahon na rin aniya upang tulungan ng mga mamamayan ang gobyerno sa pag-generate ng pondo sa pamamagitan ng pagsuporta sa responsible mining para sa sustainable development.
Binigyang diin ng opisyal na ang open-pit mining ang globally accepted method ng pagminina at pinaka-feasible para sa mga mababaw na deposits.
Pinasiguro din ng kalihim na responsableng pagmimina ang iiral sa lalawigan at magtatalaga ito ng team na siyang mag-momonitor sa open-pit mining operation.
Noong December 2021, tinanggal na ni dating Environment Secretary Roy Cimatu ang ban sa open-pit mining method na ipinatupad ni Gina Lopez noong 2017.
