Arestado ng National Bureau of Investigation (NBI)-Palawan ang isang lalaki na nagpapanggap umanong dentista sa Narra, Palawan.
Ayon kay NBI Head Agent Norman Decampong Head , nagkasa sila ng operasyon ganap na alas-dos kahapon, February 22, 2022 sa klinika ng suspek na si Richard Munoz Cabrera matapos silang makatanggap ng tip na nagpapanggap siyang dentista at nagpapabayad sa kaniyang mga pasyente.
Nagpanggap na pasyente ang ilang tauhan ng NBI para makumpirma ang ulat na kanilang natanggap sa mga naging pasyente.
Sa loob mismo ng kaniyang klinika sa Narra Avenue Bgy. Poblacion nakita ang ilang mga kagamitan na kaniyang gamit sa tuwing may dental procedure gagawin.
Walang naipakitang lisensya ang suspek kaya agad itong naaresto ng NBI.
Hindi nakita sa Professional Regulatory Commission ang pangalan ng suspek.
Nasa kustodiya ng NBI-Palawan ang suspek at mahaharap sa kasong paglabag sa R.A. 9484 o Philippine Dental Act of 2007 ang pekeng dentista.
