NAGTOO si Dr. Fidel Peñamante, ang labaw sa Philippine Medical Association sa Gensan nga ang 80 porsyento nga vaccination rate sa syudad ang nakatabang sa pag-ubos sa kaso sa Covid-19. Lakip na usab niini ang gipakusgan nga kampanya sa pagbakuna sa mga pediatric population.
Giawhag niini ang mga ginikanan nga ipa-rehistro ang ilang mga anak sa pagsugod sa online registration aron makakuha dayon og schedule para sa mas dali nga proseso sa pagpabakuna. Mamahimo lang nga moadto sa Dr. Jorge P. Royeca Hospital kung asa gilusad ang vaccination.
Kahibaloan nga unang giturukan og bakuna ang mga kabataan sa frontliners nga maoy exposed sa gawas. Apan sa karon gi-engganyo na sa mga health authorities ang tanang ginikanan nga residente sa Gensan nga ipalista na ang mga anak aron mabakunahan, magdala lang og valid ID ug birth certificate sa bata.
Sa kasamtangan wala pa gipaabot sa mga Rural Health Unit ang vaccination sa mga bata, apan gipangandaman na sa mga Barangay Officials ang kung kanus-a kini subling imugna sa mga Barangay. I Enamie Mogpon
