MOKABAT na sa 73 porsiento sa target nga 11,801 nga mag-renew sa ilang business permit alang ning tuiga ang naka-renew as of January 20.
Kini ang gibutyag ni Assistant Department Head for Administration Zenaida Eturma nga makab-ot ang target nga ihap sa maka-renew tungod sa extension sa business permit renewal hangtud February 28 nga makaayo usab sa mga taxpayers ug negosyante.
Kasamtangan anaa sa sobra dos mil ang wala pa naka-renew ug gilauman ni Eturma nga maka-renew na ang mga nahisgutan tungod sa extension nga gihatag sa LGU-GenSan.
Gidugang ni Eturma nga bisan sa pandemya, wala miubos ang naganegosyo sa GenSan bisan pa adunay nanirado apan adunay mga bag-ong nagpatukod og negosyo ug nagdugang og line og business.
Nasayran nga ang extension giaprobahan aron mahatagan og higayon ang mga negosyante nga maka-renew nga walay bayran nga penalty ug surcharges hangtud sa Pebrero 28.
