Ginahinyo makara it acting mayor it Malay sa Sangguniang Bayan nga pagasugtan sanda nga maghimo it sambilog ka kasugtanan sa mga kaiping nga mga local government units it Nabas ag Buruanga para sa disposal it mga basura sa sanitary landfill it Malay.
Raya hay kasunod sa pagpahayag it intensiyon it mga alkalde it Nabas ag Buruanga nga tuyo nanda nga pagagamiton ro nasambitan nga sanitary landfill.
Base sa acting mayor it Malay, pwede nga magpataw it bayad ro Malay sa Nabas ag Buruanga sa kada tonelada it basura nga andang ginapilak sa engineered sanitary landfill.
Ro sanitary landfill hay makit-an sa Barangay Kabulihan. Raya hay ginapamunuan it ECOS Sanitary Landfill and Waste Management Corp. ag lokal nga gobyerno it Malay.
Sa presente, ro ECOS hay nagahakot it kapin sa 40 tonelada nga municipal solid waste halin Boracay Island paadto sa mainland Malay./JIL B. LACSON
