BICOL—Posible suboot an substitution sa kandidatura kan tulong ginadan na aspirante sa local na konseho kan Donsol, Sorsogon.
Ini an ipinahayag ni Atty. Noli Pipo, Regional Director kan Comelec Bicol sa entrevista kan Brigada News FM Legazpi.
Paliwang kan opsiyal, kabali sa sarong political party an tulo kun kaya direchos kan nasambit na partido kun sasalidahan sinda, alagad kaipuhan suboot na kaapelyido an isasalida.
Pre-printed kaya suboot sa mga balota an ngaran kan mga kandidato kun kaya makrear nin karibungan kun ibang apelyido an isasalida digdi.
Pigklaro man ni Atty Pipo na bako prerogative kan pamilya an magbugtak nin kasalida sa mga nagadan na kandidato kundi prerogative kan political party na saindang pigkakabalehan.
Kun independent man suboot an kandidato, dae nang tyansa na sinda masalidahan nin siisay man dawa kapamilya pa.
Marurumduman na pare-parehong aspirante sa banwaan kan Donsol an tulong ginadan kabali an incumbent councilor asin aspirante sa pagka vice mayor na si Helen Garay Advincula asin an duwang para konsehal na sinda Karen Averilla y de la Rosa asin Xavier Mirasol.
Personal na dagit an pigtutukdong rason sa paggadan sa tulo kun sain pangenot na suspek an kontrobersyal na si Peter Joemel Advincula alyas Bikoy na ngunyan nagtetenir na sa presuhan.### |slm
