Nakilaea eun ro bangkay it eaeaki nga nakit-an nga putoe-putoe ro alima ag sa advanced state of decomposition sa Brgy. Tahing, Calinog, Iloilo, ku Oktubre 10.
Base sa imbestigasyon it Calinog Police Station, ro eaeaki hay ginkieaea nga si Dexter Ceballo, 48-anyos it Carles, Iloilo.
Ginkieaea man it Calinog MPS ro suspect nga si Arnel Chavez it Butuan City nga temporaryo nga naga-uli sa Brgy. Gama Grande, Calinog.
Uwa pa it ginpaguwa nga detalye ro mga otoridad kung paano ginhimo ro suspect ro krimen pero ginpasakaan eun it kaso nga Murder si Chavez.
Base man sa impormasyon, nagpalagiw kanday Ceballo ag Chavez sa Carles bangud sanda ro ginaturo nga nag-hold up sa collector it sambilog ka lending company./JIL B. ACSON
