SIRADO ang mga sementeryo sa GenSan sa Oktubre 29 hangtud Nobyembre 2 alayun sa pag-obserba sa Undas 2021.
Kini ang gibutyag ni Mary Ann Calonzo Tan, head sa City Housing and Land Management Office nga nahuman na sila sa gihimong meeting kauban ang IATF alang sa ipatuman nga patakaran sa Undas 2021.
Sa gikasabutan, nga may oras nga siradhan ang gate sa sementeryo sa ACAMP hinungdan walay gitugutan nga mag-overnight tungod gibawal kini.
Bisan mga bata ug senior citizens, gidid-an usab makasulod sa sementeryo ug kinahanglang musunod sa mga health protocols.
Gihimong rason ni Tan nga bisan pa may pag-ubos sa kaso sa COVID-19 apan dili gihapon magkumpyansa tungod ang maong okasyon, sagad gayud may dakong panagtapok sa mga tawo.
Bisan kon sirado ang sementeryo alang sa pagbisita, gitugutan usab ang paglubong sa maong mga petsa alang sa mga COVID-19 deaths, ug dili sa mga regular nga lubong.
Alayun niini giawhag ni Tan ang katawhan nga karon pa lang magbisita na sa ilang mga minatay ug sundon ang health protocols.
