GIKUMPIRMA sa City Budget Office nga adunay bag-ong figure sa pondo alang sa National Tax Allotment kon NTA nga mahimong epektibo sa tuig 2022.
Sa impormasyon gikan kay City Budget Officer John Philip Quemosing ang NTA sa Gensan sunod tuig naa sa P2.79 billion pesos gikan sa average nga P1.4 billion pesos sa sulod sa nakalabay nga lima ka tuig, nadugangan kini og P125 million pesos ug anaa sa 166 percent ang usbaw.
Sa 2020 anaa sa P1.8 billion pesos ang Internal Revenue Allotment sa GenSan ug madugangan gumikan sa Mandanas Ruling nga gisugdan na sa paghan-ay sa Goberno.
Samtang sa bahin sa Treasurers Office gikumperma ni Assistant Department Head Zenaida Eturma nga aduna gayod epekto sa mga negosyo ang pandemya adunay nag-apply alang sa retirement, aduna usab nag-abli og laing negosyo nga anaa sa essentials, ilaha pa usab ginahan-ay ang data alang sa ikatulong quarter sa 2021 itandi sa ubang quarter.
Gidugang ni Eturma nga ang direksyon karon sa ilang opisina mao ang mga online technology aron nga mapasayon ang pagkolekta og buhis, sama sa online payment sa Pay Maya o kaha sa GCash system.
Ang kaayuhan daw niini kay bisan wala sa Gensan ang taxpayer makahimo gihapon kini sa pagbayad online.
Alayon usab daw kini sa Ease of Doing Business ug sa pagpatuman sa gihapon sa health protocol gumikan sa padayon nga pandemya. ( Ver Diazon)
