KALIBO, AKLAN—Padayon nga nagaapela do Aklan Provincial Government kay Pangoeong Rodrigo Duterte nga i-konsidera do andang panawagan nga indi pag ipadayon do planong pagpatindog it casino sa isla it Boracay.
Angot kara, nagpasa it sangka draft resolution do Sangguniang Panlalawigan Aklan kung siin nakabaehag kara nga maabo pang lugar o tourist destination sa nasyon nga puwedeng butangan it casino nga madaling agtunan it mga turista kaysa sa Boracay.
Nagpanindugan man do mga SP Members nga indi eon kinahangean it Boracay do casino bangud nga do ginaagto sa isla it mga turista hay agud nga mag-relax ag magbakasyon ag bukon it para maghampang sa casino.
Kung madumduman, ku nagtaliwan ng adlaw it Sabado hay nagpatigayon it caravan do mga kaparian, local nga opisyal ag iba pang sector sa probinsya agud nga ipaabot do andang pagbaeabag sa pagpatukod it casino sa isla.// SHERRY ANNE REUNIR-VIDAL
