KASADO na ang ipahigayong one time bigtime clearing operation sa mga vendors palibot sa city public market sa GenSan karong Oktubre 1.
Segun ni Kapitan Eliseo Rock Garay sa Barangay Dadiangas South nga hinluan sa mga vendors ang Magsaysay Ave, Santiago Blvd, Cagampang, Casquejo ug West side street tungod nahuman na ang konsiderasyon nga gihatag kanila ug nakapangita na og kabalhinan ang syudad.
Matud ni Garay nga anaa sa 400 ngadto sa 500 ka vendors ang maigo sa clearing operations nga gihimo tungod sa mando usab sa DILG nga i-resume ang clearing operation human maundang niadtong Nobyembre tungod kinahanglan nga may kabalhinan ang mga vendor nga maapektuhan.
Gibutyag usab ni Garay nga gihimo ang paglimpyo sa mga vendor sa palibot sa palengke aron dili maghuot sa maong lugar ug sa pagsunod sa mando sa DILG.
Giangkon usab niini nga gusto usab sa mga katawhan mahan-ay ang agianan pasulod sa palengke.
