Nakabaton ro Philippine National Police Maritime Group it sambilog ka report halin sa mga lokal nga manugpangisda nga may sambilog ka fishing vessel nga nagahiwat it hulbot-hulbot.
Ro hulbot-hulbot hay sambilog ka pamaagi it pagpangisda nga nagapanamad it mga coral reefs bangud nagagamit raya it mga ginpabug-at nga eambat nga ginabira man it fishing vessel agud makadawi it isda.
Sa pagpanguna it Provincial Bantay Dagat Task Force, kaibahan ro Bureau of Fisheries and Aquatic Resources, ag Patnongon PNP; gindakop ro baynte-kwatro ka mga kaeaeakihan halin sa Cebu nga iligal nga nagapangisda sa katubigan it Patnongon, Antique.
Base kay Antique Governor Rhodora J. Cadiao, pasakaan it kaso ro tag-ana it fishing vessel, pagmultahon man sanda it inisyal nga penalidad nga nagabalor sa Php2 million kabaylo it andang kahilwayan.
Base sa Republic Act 10654, Section 97 and Fisheries Administrative Order No. 246-1, ro mapamatud-an nga nageapas sa nasambitan nga laye hay taw-an it penalidad nga limang beses sa balor it nadawi nga isda o Php2 million, kaibahan dikara ro pagkumpiska sa mga nadawi nga isda ag kagamitan.
Matatandaan nga buhay eun nga problema it banwa it Patnongon ro iligal nga pagpangisda sa sueod it daywang dekada./JIL B. LACSON
