APRUBADO na sa ang-ang sa kometiba ang sugyot balaudnon nga nagabawal sa paglabay bisan asa sa COVID-19 related materials sama sa facemask ug faceshield.
Sumala sa nagpanday sa balaudnon nga si Kagawad Lourdes Casabuena nga ang ulohan sa balaudnon mao ang COVID-19 Related Waste Proper Disposal Ordinance of the City.
Ang tumong daw niini mao ang pag-amping sa panglawas sa katawhan kay makita nga daghang facemask ug faceshield nga ginalabay sa mga kadalanan ug delikado kon nataptan sa virus ang nigamit sa mao nga materials.
Nalakip sa mao nga balaudnon ang saktong paglabay sa basura gikan sa mga tambalan nga ginadalhan sa mga pasyente nga may sintomas sa COVID-19, ang sugyot nga kolor yellow nga bag ang sudlan sa COVID-19 Related Materials sa mga tambalanan.
Sumala kay Dr. Ryan Aplicador, Hospital Chief sa Dr. Jorge P. Royeca Hospital nga uyon siya sa mao nga balaudnon ug gisugyot niini nga unta adunay facility nga matukod sa syudad aron kalabayan sa hospital waste ug dili na mobayad sa Davao facility.
Gidugang ni Aplicador nga aduna silay disinfection nga ginahimo sa ilang mga basura ug dili mabalaka ang publiko.
Giduso usab sa labaw sa kometiba sa maayong panglawas nga si Kagawad Rosalita Nuñez nga inay nga may first second ug third offence penalty usahon nalang sa matag dakop sa musupak P500 ang ipahamtang nga multa.
Gisugyot usab ni Nuñez nga dapat adunay enforcers nga manakop ug may himuon nga proyekto sa sanitary landfil aron malahi ang mga basura batok COVID-19.
Pabor usab sa mao nga balaudnon ang usa ka Vendor gikan sa Barangay Ligaya nga si Mae Robleza, sumala niini nga maayo ang tumong sa mao nga sugyot apan kinahanglan adunay himuon ang syudad nga paagi aron ma kolekta ang mga facemask ug faceshield kay wala daw sila nagasunog ilaha lang ginaputos unya ginalubong kay wala daw nagakolekta sa ilang basura.
Giduso ni Kagawad Lucio Cawayan ang pag-apruba sa mao nga sugyot balaudnon ug gisegundahan sa ubang miyembro sa kometiba. ( Ever Diazon)
