Ro probinsiya it Aklan eamang sa sa isla it Panay ro uwa pa it narekord nga Delta variant it COVID-19 disease.
Matandaan nga ro mas mabaskog nga variant it nasambitan nga virus hay narekord eun sa mga probinsiya it Capiz, Antique, ag Iloilo.
Samantala, ro Aklan man hay nakapagrekord it indi magtaas sa 10,000 kabilugan nga COVID-19 infection ag 184 nga mga namatay halin kat nag umpisa ro pandemya ku nagtaliwan nga dag-on.
Ku nagtaliwan nga biyernes eamang, ro seven-day rolling average it mga bag-ong infection sa Aklan hay nagaabot eun sa 200 cases kada adlaw.
Bangud sa nakakaalarma nga numero, ginapahanumduman ni Aklan Governor Florencio Miraflores ro mga tawo nga magsunod gid sa ginapatuman nga mga protocols para malikawan ro pagtaas it mga kaso.
Base pa sa ana, may mabahoe nga tsansa nga nakaangkun eun ro probinsiya it Delta variant pero uwa pa raya nadetect it lokal nga otoridad./JIL B. LACSON
