BICOL—Iinguwahon suboot kan Albay Power and Energy Corporation (APEC) na mapunan na ngunyan na bulan nin Hulyo an pagtakod kan mga prepaid meters na gagamiton para sa pilot implementation kaini sa Barangay Bacolod, syudad nin Tabaco.
Sigun ki APEC Chief Operations Officer (COO) Apolinario Alvarez, nagkaigwa na sinda nin consultation sa nasabing barangay asin positibo man suboot an naging simbag kan mga residente.
Pighahalat na sana ninda ngunyan na maideliver an mga kinakaipuhan na kagamitan ngani mapunan na an installation kan mga metros sa mga households.
Paliwang ni Alvarez, napili ninda an Barangay Bacolod na maging pioneer kan proyekto huli ta dakol suboot digdi an mga dae nagbabayad nin bill asin an mga naghahabas nin kuryente.
VC ALVAREZ// Sa kabilugan na 400 na households, 208 suboot an registered customer alagad apat sana an nagbabayad nin bill. //
Sa paagi kaya suboot kan prepaid meter, dae nanggad matatakasan an bill huli ta siring kan simcard sa cellphone, dae ini magagamit na warang load.
Oras na magtrayumpo ini sa Barangay Bacolod, plano kan APEC na ipaotob ini sa bilog na probinsya nin Albay.
Mientrastanto, kinumpirmar ni Alvarez na nasa 30 sagkod 40 persona an nadadakop sa paghabas nin kuryente kada aldaw sa tabang kan Special Operations Group katuwang an PNP asin gabos suboot ini pigsasangatan nin kaso.### || SLM
