LEGAZPI CITY – Uminabot na sa 67 an mga kaso nin dengue na nairehistro sa probinsya kan Albay base sa datos na iniluwas kan Department of Health Bicol puon kan bulan nin Enero hasta Hulyo 17 ngunyan na taon.
Segun sa ahensya, an Legazpi asin Daraga an parehong nangengenotan na may 22 na kaso, sinundan ini kan Camalig na igwa nin anom, Sto. Domingo na igwa nin apat, tigduwa sa Tabaco City, Libon asin Jovellar, mantang tigsararo sa Polangui, Malilipot, Manito, Oas, Tiwi, Guinobatan asin Malinao.
Mientrastanto, warang nairerehistrong kaso sa Pio Duran, Bacacay, Rapu-rapu asin Ligao City, alagad pag-abot naman sa fatality o pagkagadan, saro an nairehistro sa probinsya partikularmente sa Legazpi City.
Huli kaini, padagos an pagirumdom kan DOH Bicol na ugalion an paglinig sa mga kaharungan tanganing makalikay sa nasambit na helang.
