Priso sa Roxas City Police Station ang isa ka lalaki matapos ginserbihan sang warrant of arrest sang kapulisan sa Sto. Niño, Brgy. Baybay, Roxas City takna alas 11:03 sang aga kahapon sang Lunes, Hulyo 29.
Ginkilala ang akusado kay alyas “Noynoy”, 26-anyos, single, wala sang trabaho kag residente man sang nasambit nga lugar.
Nagapangatubang ini sang kaso nga pagpangawat ukon “Theft” kun sa diin ang warrant of arrest ang gin-isyu kag ginpermahan ni Judge Jennie Ann Tayag Logronio, Municipal Trial Court in Cities, Branch 1, Roxas City napetsahan Hulyo 22, 2024.
Ginrekomendar sang korte ang P24,000 nga piyansa para sa temporaryo nga kahilwayan sang akusado. | Judy Ann Juare
