Usa ang patay samtang kapin kun kulang 100 ka panimalay lakip ang Diego Silang Elementary School ang nadanyos sa natigayong sunog sa Punta Dumalag, Matina Pangi ning syudad Sabado sa hapon.
Ang biktima giila nga si Reynaldo Salinas, 76-anyos nga naapil ug kaugdaw sa iyang balay human nga na-trap tungod dili na kini makalakaw ug walay kauban sa dihang niulbo sa ang sunog.
Gibutyag ni SFO4 Ramil Gillado, labaw sa Intelligence and Investigation Section sa Davao City Fire District, nagsugod ang sunog sa balay sa usa ka Aida Maceda sa napasagdang niluto nga paspas milanit sa ubang parte sa balay ug nikatay sa ubang kabalayan.
Tungod niini anaa sa kapin 400 ka pamilya ang nawad-an og pinuy-anan samtang mokabat sa 2.6 milyones pesos ang gibiling danyos.
Ang mga apektadong residente ang nagpabilin una sa covered court sa Matina Aplaya nga giatiman na karon CSSDO, Vice Mayors Office nga gikatakdang tunulan og hinabang sa lokal nga panggamhanan. BNFM-DAVAO
