Patay na sang masapwan sa sulod sang ila puluy-an ang isa ka trabahador matapos ginaalegar ginluthang sang wala matumod nga suspetsado sa Brgy. Capuyhan, Sigma, Capiz sang tinalikdan nga Hunyo 24.
Ginkilala ang biktima kay alyas “Nonoy,” 23-anyos, residente man sang nasambit nga lugar. Sandig sa imbestigasyon sang Sigma Municipal Police Station, takna alas 11:00 sang aga sa kapareho man nga adlaw, nasapwan nalang ni alyas “Marivic” ang iya live-in partner nga duguon kag wala na sang kabuhi.
Nadiskubrehan sang kapulisan nga may pilas sa ulo ang biktima tuga sang pagpangluthang. Narekober sa crime scene ang isa ka slug kag empty shell sang 9mm pistol. Sa karon, padayon pa ang imbestigasyon sang kapulisan agud matumod ang may kahimuan sang krimen. | Judy Ann Juare
