Usa ka bus nga ginag-iyahan sa Bacolod City nalimbuwad sa may Purok Talos, Brgy. Igmayaan, Lungsod sa Don Salvador Benedicto, pasado alas-5 kaganinang hapon.
Basi sa mga report, ang maong bus dunay karga nga 36 ka mga magtutudlo sa Paglaum Village Elementary School nga padulong na tani ug pauli sa Bacolod City human ang ilang Team Building sa Sipaway Island, Dakbayan sa San Carlos.
Matod pa sa driver, wala na mikagat ang brake sa maong bus nga miresulta sa pag limbuwad niini sa may kurbada nga parte sa Purok Talos, Brgy. Igmayaan, diha sa Lungsod sa Don Salvador Benedicto.
Sa update nga gipagawas sa Drrmo Bacolod City, adunay 1 nga patay ug 34 ka mga samaran sa maong aksidente. Sa pagkakaron, anaa sa Bacolod Adventist Medical Center ug Corazon Locsin Montelibano Mem. Hospital ang maong mga biktima.
