LEGAZPI CITY – Konsideradong top producer ki ginto an Bicol Region sa bilog na Pilipinas segun sa Mines and Geosciences Bureau (MGB) Bicol.
Sinabi ni MGB Bicol Regional Director Guillermo Molina, Jr.,huli ini sa Masbate Gold Project na iyo an nangengenot na gold producer na minaabot sa 2 billion pesos an kantidad kada bulan na mas halangkaw kumpara sa national average.
Mientrastanto, katakod kaini, padagos man an piggigibong social development and management program sa mga lugar na may mining project para sa mga residente kaiba na an patubig, pailaw, tinampo asin health services nganing maasigurar na nagbebenipisyo man an komunidad.
Sa ngunyan, pigtututukan man kan ahensya an pagpautob ki regulasyon sa pagmimina kun sain dapat an gagamiton su kaipuhan sana nganing may matada pa para sa puturo asin dapat siguradong stable an binayaan na proyekto sa sarong lugar.
