Hindi kumbinsido ang Philippine National Police sa sinasabi ng Amnesty International na nagpapatuloy ang extra judicial killings noong 2023.
Ayon kay PNP Public Information Office Chief Col. Jean Fajardo, hindi nila alam kung saan nakuha ng human rights organization ang pagkakaroon umano ng mahigit animnaraang kaso ng pagpatay na may kaugnayan sa war on drugs.
Malayong-malayo aniya ito sa mga numero ng PNP.
Binigyan-diin din ng opisyal na kailanman ay walang naging direktiba ang PNP na pumatay.
Kapag sinabi aniyang extra judicial killing , state-sponsored o gawa ito ng mga otoridad.
Aniya, hindi ito ang tinatahak na direksyon ng Administrasyong Marcos.
Iginiit ni Fajardo na nais ng Pangulong Ferdinand Marcos Jr. ay whole of nation approach kung saan maging ang demand reduction ng iligal na droga ay dapat tutukan.
