KALIBO, AKLAN—Napueong banwa sa probinsya it Aklan do ginakabig nga flood prone areas base sa datos it Mines and Geosciences Bureau (MGB) sa Western Visayas.
Raya hay ginaeakipan it mga banwa it Kalibo, Numancia, New Washington, Malinao, Banga, Lezo, Madalag, Libacao, Altavas ag Balete.
Suno kay Mae Magarzo, chief geologist it MGB Region 6, do mga manaba nga lugar at do mga lugar nga maeapit sa suba, baybay ag sapa hay nakaangdan nga flood prone ngani nga do mga residente kara hay kinahangean nga mangin vigilante at pirming maging handa sa pagbakwit eabi eon nga una sa “typhoon season” do Pilipinas.
Nasayuran nga do Provincial Disaster Risk Reduction and Management Office (PDRRMO) Aklan hay may una nga ginpamutang nga water level sensors sa upstream it Aklan River ag flood early warning system sa tagsa ka munisipalidad agud nga insigida nga makatao it abiso sa publiko angot sa baha. // SHERRY ANNE REUNIR-VIDAL
