LEGAZPI CITY – Inanunsyar kan Commission on Elections (COMELEC) Legazpi na sa maabot na Pebrero 19 asin 20, an mga COMELEC offices sa Albay matiripon sa Bicol University College of Engineering.
Sa intrevista kan Brigada News FM Legazpi kay COMELEC Legazpi Election Officer Atty. Connie Del Castillo, sinabi niya, obheto kaining maakomodar an mga estudyante kan unibersidad na makapagparehistro sa paagi kan satellite registration.
Segun saiya, kaiba ninda duman an gabos na munisipyo sa probinsya.
Apwera kaini, sa pangaduwang aldaw kan satellite registration, bubuksan sa publiko an pagpaparehistro.
Mientrastanto, enot naman na inanunsyar ni Del Castillo na ipapautob ninda ngunyan na aldaw an Register Anywhere Program, kun sain pwedesir saindang makipagtransaksyon an mga aplikante maski bako man taga-Legazpi.
Alagad, magigin epektibo su boot sana ini kada enot na Sabado kan bulan, apwera ngunyan na enot na aldaw kan Voter Registration.
Kun magigirumduman man, kan nakalihis na Pebrero 8, sarong Memorandum of Agreement an pinirmahan kan COMELEC asin BU para sa paglunsar kan BU KUGOS COMELEC: Special Satellite and Register Anywhere Program.
