LEGAZPI CITY – Makakaresibe nin 500 sako nin hybrid rice seed varieties an mga paraoma kan Camalig hale sa Municipal Agriculture Office (MAO).
Ini an ipapanao sa mga ugwa nin irrigated farms na nakarehistro sa Registry System for Basic Sectors in Agriculture (RSBSA) na obhetong magtao nin suporta asin mapalangkaw an saindang ani nganing madugangan an kita.
An programang ini nasa irarom kan National Rice Program nin Department of Agriculture na sarong interbensyon nganing matabangan an mga paraoma sa naglalangkaw na presyo kan mga agricultural inputs orog na pag dry cropping seasons.
Mientrastanto, parte an lakdang na ini kan pagdugang sa implementasyon kan hybrid rice technology sa naunambitang banwaan.
