Ginlunsar na sang Department of the Interior and Local Government (DILG) ang ila programa nga may tema “BUHAY AY INGATAN, DROGA’Y AYAWAN” (BIDA) kahapon nga adlaw sang Miyerkules, Setyembre 20, 2023 sa Capiz Gymnasium.
Sa interview sang Brigada News FM Roxas City kay Cherryl P. Tacda, DILG Provincial Director, iya ginpahayag nga ang nasambit nga programa ang isa ka national advocacy agud malapnag ang kampanya kontra sa iligal nga droga kag subong man agud mapabaskog ang koordinasyon sang mga ahensya nga naga-implementar sang amo nga programa lakip na diri ang mga Local Government Units.
Paagi sa sini nga tikang, ginapakita lamang ang determinasyon sang gobyerno nga protektahan ang kabuhi kag kaluwasan sang mga pumuluyo batok sa epekto sang ilegal nga droga.
Nag-ugyon sa DILG ang Gobyerno Probinsyal sang Capiz, Philippine Drug Enforcement Agency (PDEA), Capiz Police Provincial Office (CPPO) kag Sangguniang Kabataan Federation.
Personal man ini nga gintambungan nanday Provincial Administrator Atty. Ike Biñas, LMP President Mayor Raymund Malapajo, DILG Assistant Regional Director Maria Calpiza J. Sardua, CESO IV. PLTCOL Ariel Tico, PDEA Provincial Director, IA5 Maria Melinda Panaguiton. | Judy Ann Juare
