LEGAZPI CITY – Pormal ng binuksan kasuhapon sa publiko an 1st Bicol Coconut Trade Fair kan Department of Trade and Industry (DTI) Bicol kasabay an Philippine Coconut Authority (PCA) Bicol asin an Coconut Farmers & Industry Development Plan (CFIDP) sa sarong mall digdi sa syudad kan Legazpi.
Pinangenotan ni DTI OIC Regional Director Dindo Nabol, an nasambitan na aktibidad, kaibahan an iba pang mga opisyales asin personahe kan nasambit na mga opisina.
Segun kay Nabol, nasa 41 coconut food asin non-food products an pigbida kun sain resulta ini kan suporta asin pinagpagalan kan manlaen-laen na stakeholders asin partners kan CIDP program.
Ini su boot programa na kinababalehan kan manlaen-laen na stakeholders asin partners, kun saen an DTI an nag-iimplementar ki mga plano sa irarom kan research, marketing, asin promotions sa coconut MSMEs.
Madurar an trade fair sa laog nin 4 na aldaw puon kasuhapon sundo sa Agosto 27 asin pig-eenganyar man an mga komunidad na i-avail an baratong mga produckto.
Obheto kaini na palangkawon an kita asin produktibidad kan mga paraoma nin niyog, pagbusol sa pagpapagian kan buhay, edukasyon, asin pagkakapantay-pantay, asin i-rehabilitate o gibuhong moderno an industriya kan niyog sa nasyon.
