Nagnubo sang 10.64% ang kaso sang Dengue sa probinsya sang Capiz kun ipaanggid sa kapareho nga period sadtong tuig 2022 nga may yara sang 498 ka mga kaso.
Ini ang ginkumpirma ni Mr. Jeoffrey Espiritu, tagpamaba sang Provincial Health Office sang ma-interview sang Brigada News FM Roxas City.
Suno kay Espiritu, base sa ila monitoring humalin Enero 1 tubtob Agosto 12, 2023 nagdangat sa 445 ang nabalhag nga kaso sang nasambit nga balatian, 442 diri ang nakarekober samtang tatlo ang ginbawian sang kabuhi.
Ginpahayag sini nga nagapanguna sa may pinakamadamo nga kaso nga nabalhag ang banwa sang Panay nga may 95; Roxas City nga may 93; Tapaz nga may 87; Dumarao nga may 22; Pontevedra kag Dao nga may tig-20; Dumalag nga may 19; Mambusao nga may 17; Sigma nga may 14; Jamindan nga may 13; Panitan nga may 11; Cuartero nga may 9; Pilar nga may 8; Ivisan nga may 6; President Roxas nga may 5; Sapian kag Maayon nga may tig-3.
Samtang, natumod ang siyam ka mga barangay sa probinsiya nga may ‘clustering’ sang kaso sang nasambit nga sakit kalakip ang Barangay Poblacion Ilaya, Tanza Sur, Pili, Bago Chiquito, Bato, kag Lomboy, sa Panay; Barangay Nasunogan, Dao; Barangay Dayao, Lanot, sa Roxas City.
Pinaka-apektado ang naga-edad sang 10 tubtob 19 anyos nga nagabug-os sa 28.99% sa mga nakaangkon sang nasambit nga balatian.
Nagpanugyan naman sa publiko si Espiritu, nga sundon ang pag-obserbar sang 4S strategies batuk sa balatian nga dengue ini amo ang Search and destroy, Secure self-protection, Seek early consultation kag Say yes to fogging. | Judy Ann Juare
