Nagpatigayon sang Piso Caravan ang Bangko Sentral ng Pilipinas (BSP) Capiz kag Regional sa pagpanguna ni Gregorio Bacay, Acting Operation Officer, sang damlag lang sa syudad sang Roxas.
Sa interview sang Brigada News FM Roxas City kay Bacay, ginpahayag sini nga tinutuyo sang nasambit nga caravan amo ang paghatag sang value sa mga kwarta nga nagkaladunot, nagakalagisi sa sobra nga gamit ukon pagtago rason nga wala na ginabaton.
Naghatag man sila sang mga impormasyon kun paano hatagan sang importansiya ang mga kwarta kag indi ini dapat pagpabay-an nga madunot kag magisi.
Nagapanawagan man ini sa mga pumuluyo nga kun may nahawiran nga kwarta nga dunot kag indi na mapuslan pwede ini mapabaylohan sa Bangko Sentral ng Pilipinas (BSP).
Ginatawag nga “unfit” ang kwarta kun yukot na kaayo, dunot, panas na ang printa, kag may higko ukon may mantsa.
Samtang “mutilated” naman ang tawag sa kwarta nga may mga gisi, buslot ukon guba na.
Sa mga gusto magbukas sang account sa bangko ukon e-wallet, may yara sang mga financial service providers nga magapatigayon sang account opening kag financial learning sessions para sa may luyag sang dugang nga ihibalo naangot sa kwarta. | Judy Ann Juare
