Hugot nga gidili ang tigbakay sa kabarangayan kung walay ordinansa ang local government unit (LGU).
Kini human gibutyag ni Cebu City Councilor Pastor ‘Jun’ Alcover nga sabong o tigbakay tipik sa tradisyon ug kultura sa mga Pilipino, ilabi na panahon sa fiesta busa angay nga maklaro ang legalidad niini.
Apan matud ni Cebu City Police Office chief Police Col. Ireneo Dalogdog nga kung basehan ang balaod, kadto lamang legal nga mga buwangan ang gihatagan og pagtugot nga makapahigayon sa sabong.
Hinuon giklaro sa hepe sa CCPO nga kung Adunay ordinansa ang Dakbayan nga magtugot sa mga barangay panahon sa fiesta nga makapahigayon og tigbakay, andam silang mutuman niini.
Tungod niini, ipahigayon ang executive session sa Mayo 3 diin dapiton ang mga representante sa CCPO, mga operator sa mga buwangan, Cebu City Gamefowl Commission, buhatan sa mayor ug Association of Barangay Councils arun hisgutan ang legalidad sa tigbakay.//
